សៀមរាប៖ អភិបាលខេត្តសៀមរាប លោក ទៀ សីហា បានបញ្ជាក់ថា ពលរដ្ឋដែលទទួលបានសំណងលំនៅឋានថ្មីនៅតំបន់រុនតាឯក បានសាងសង់បានជិត ២ពាន់ខ្នងហើយ ក្នុងនោះមានទាំងសំណង់រឹងមាំ និងសំណង់សម្រាប់រស់នៅមិនអចិន្ត្រៃយ៍។
លោក ទៀ សីហា បានថ្លែងនៅក្នុងសន្និសីទសារព័ត៌មានស្តីពី «ភាពជោគជ័យក្នុងរយៈពេល ៥ឆ្នាំកន្លងមក របស់រដ្ឋបាលខេត្តសៀមរាប» នាព្រឹកថ្ងៃទី២៩ ខែមីនា ឆ្នាំ២០២៣ថា ផ្លូវនៅតំបន់រុនតាឯកដែលជាទីតាំងថ្មីដែលប្រែក្លាយពីតំបន់ជនបទ មកជាទីក្រុងរណបថ្មី ត្រូវបានស្ថាបនារួចរាល់ ខណៈទឹក អគ្គិសនី និងប្រព័ន្ធទូរគមនាគមន៍ក៏បានចូលទៅដល់តំបន់នោះផងដែរ។
លោកបន្តថា ហេដ្ឋារចនាសម្ព័ន្ធផ្សេងៗក៏បាន និងកំពុងស្ថាបនា ដែលពោរពេញទៅដោយភាពល្អស្អាតមិនចាញ់នឹងរដ្ឋារចនាសម្ព័ន្ធដែលស្ថិតនៅក្នុងក្រុងសៀមរាបឡើយ។
បើតាមលោកអភិបាលខេត្ត ពលរដ្ឋបានស្ម័គ្រចិត្តរុះរើសំណង់នៅតំបន់រមណីយដ្ឋានអង្គរចំនួនជាង ៩ពាន់គ្រួសារ ក្នុងនោះមាន ៦ពាន់គ្រួសារបានចាប់ឆ្នោតយកដីឡូត៍សម្រាប់សាងសង់លំនៅឋានថ្មីនៅទីនោះ។
លោក ទៀ សីហា បានបញ្ជាក់ថា ពលរដ្ឋដែលស្ម័គ្រចិត្តរុះរើលំនៅឋានចេញពីតំបន់អង្គរទៅស្នាក់អាស្រ័យនៅតំបន់រុនតាឯក គឺជាជម្រើសដ៏ល្អដែលរាជរដ្ឋាភិបាលផ្តល់ដីកម្មសិទ្ធិត្រឹមត្រូវដល់ពលរដ្ឋ ប្រសើរជាងពលរដ្ឋរស់នៅតំបន់អង្គរដែលគ្មានប្លង់ដីច្បាស់លាស់ត្រឹមត្រូវ៕
